Atik 1 — Objè kontra a

Kontra sa a fikse kondisyon pou Prestatè a fè, poukont li, ti travay Datamio ba li, tankou (men se pa sèlman):

• li fraz byen fò pou anrejistre vwa;
• ekri sa li tande nan yon odyo;
• verifye, korije epi chwazi tèks;
• verifye travay lòt prestatè (validatè yo);
• klase, anote oswa nenpòt lòt travay sou lang oswa odyo platfòm Datamio bezwen.

Atik 2 — Kalite relasyon an

Prestatè a travay poukont li (travayè endepandan). Kontra sa a pa fè l tounen anplwaye Datamio: pa gen kontra travay, pa gen lyen sibòdinasyon, pa gen egzklizivite. Prestatè a:

• òganize tan li jan li vle;
• chwazi travay li vle fè;
• sèvi ak pwòp materyèl li (telefòn, òdinatè, mikwo, entènèt, elatriye).

Prestatè a deklare li gen omwen 18 an. Se li sèlman ki responsab obligasyon fiskal ak sosyal li sou kòb li touche.

Atik 3 — Kijan travay yo fèt

3.1. Prestatè a jwenn ti travay yo nan aplikasyon Datamio a oswa nan nenpòt lòt zouti Datamio mete disponib.

3.2. Datamio bay travay selon demann, priyorite mache a ak kalite travay Prestatè a. Datamio pa garanti gen travay tout tan, epi li ka mete yon limit travay pa jou.

3.3. Chak travay dwe respekte enstriksyon yo bay, nòm kalite Datamio, ak dat limit lè gen youn.

3.4. Aplikasyon an ka tcheke yon travay otomatikman anvan li pati (rekonesans vwa, mezi kalite son sou telefòn nan) epi mande Prestatè a refè l.

Atik 4 — Pri ak grid peman

4.1. Pri yon travay depann de kalite travay la, longè l (kantite mo, longè odyo a), konpleksite l, demann mache a ak kantite travay ki nesesè.

4.2. Aplikasyon an montre pri chak travay anvan Prestatè a fè l. Pri ki parèt lè Prestatè a voye travay la, se li Datamio dwe peye si travay la valide.

4.3. Datamio ka chanje grid pri a pou travay ki poko fèt. Prestatè a aksepte pri yo ka chanje ak tan, epi se sèlman travay ki valide kòrèkteman ki bay dwa pou peman.

Atik 5 — Peman

5.1. Kòb chak travay ki valide antre nan balans Prestatè a nan aplikasyon an.

5.2. Prestatè a ka mande retire kòb li depi balans li rive nan minimòm aplikasyon an montre a (kounye a 100 goud).

5.3. Datamio peye sou kont MonCash Prestatè a, apre li fin verifye kont sa a (nimewo, non ak kòd QR). Datamio ka aksepte yon lòt mwayen peman, tankou yon virman nan bank lokal, si li dakò alekri.

5.4. Datamio trete chak demann retrè nan 14 jou pou pi plis (anjeneral nan 48 è).

5.5. Prestatè a ka wè detay travay ki valide ak peman yo nenpòt lè nan aplikasyon an (paj « Kòb »).

Atik 6 — Pwopriyete entelektyèl, done ak sekrè

6.1. Tout sa Prestatè a pwodui nan travay yo (anrejistreman, tèks, koreksyon) tounen pwopriyete eksklizif Datamio depi travay la valide epi kòb li antre nan balans Prestatè a.

6.2. Prestatè a otorize Datamio sèvi ak anrejistreman vwa li ak tèks li, kopye yo, modifye yo epi difize yo pou fòme, evalye ak amelyore modèl AI, sa gen ladan l nan seri done Datamio pataje ak lòt moun oswa pibliye, san limit nan tan ni nan espas. Nan seri done sa yo, travay yo mache ak yon idantifyan anonim, epi petèt sèks, tranch laj ak depatman Prestatè a, men pa janm non li ni nimewo telefòn li. Prestatè a konprann vwa yon moun ka fè moun rekonèt li.

6.3. Travay ki rejte pa peye, epi Datamio pa sèvi ak yo pou fòme modèl AI; li ka kenbe yo pou kontwole kalite.

6.4. Prestatè a pran angajman pou l:

• pa divilge okenn enfòmasyon konfidansyèl;
• pa sèvi ankò ni pibliye done li trete yo;
• kenbe sekrè zouti, grid pri, metòd ak done Datamio.

Angajman sa yo rete menm apre kontra a fini.

6.5. Datamio trete done pèsonèl Prestatè a jan Politik konfidansyalite ki sou sit li a di l.

Atik 7 — Kalite ak validasyon

Se Datamio, oswa validatè li chwazi, ki valide travay yo. Travay ki pa bon, ki pa fini, ki pa swiv enstriksyon yo oswa ki gen erè ka:

• rejte;
• korije pa Prestatè a san lòt peman;
• oswa refize nèt.

Si gen fwod (vwa yon lòt moun, vwa sentetik oswa anrejistre davans, tèks kopye nan yon zouti otomatik, plizyè kont pou yon sèl moun), Datamio ka anile validasyon travay sa yo, retire kòb yo nan balans lan epi bloke kont lan.

Atik 8 — Fen kontra a

Nenpòt nan pati yo ka mete fen nan kontra a nenpòt lè, san bay rezon, avèk yon notifikasyon alekri (yon mesaj nan aplikasyon an oswa sou WhatsApp konte). Prestatè a ka mande pou yo efase kont li nan aplikasyon an.

Datamio rete oblije peye travay ki deja valide; li pa dwe anyen pou travay ki rejte.

Atik 9 — Lwa, tribinal ak lang

Se lwa Repiblik Ayiti ki aplike pou kontra sa a. Si gen yon diskisyon, se tribinal ayisyen ki gen konpetans yo ki va jije l.

Kontra a ekri an fransè epi tradui an kreyòl ayisyen. Si gen diferans ant de vèsyon yo, se vèsyon fransè a ki konte.

Atik 10 — Chanjman nan kontra a

Datamio ka chanje kontra sa a. Lè sa rive, aplikasyon an ap montre nouvo vèsyon an, epi Prestatè a dwe aksepte l anvan li fè lòt travay.

Atik 11 — Akseptasyon ak siyati elektwonik

Lè Prestatè a siyen kontra sa a nan aplikasyon an, li rekonèt li li l, li konprann li epi li aksepte tout kloz li yo. Datamio kenbe siyati a, dat ak lè a, adrès IP a, aparèy la ak yon anprent nimerik tèks ki siyen an. Prestatè a ka wè kontra li nenpòt lè nan aplikasyon an (paj « Mwen »).